ມີຍິງ 20,000 ຄົນສະໝັກໄປດວງຈັນກັບມະຫາເສດຖີຍີ່ປຸ່ນ

ມີຍິງ 20,000 ຄົນສະໝັກໄປດວງຈັນກັບມະຫາເສດຖີຍີ່ປຸ່ນ

ຢູຊາກຸ ມາເອຊາວະ ມະຫາ​ເສດຖີ​ຂອງ​ຍີ່​ປຸ່ນໄວ 44 ປີ ອະ​ດີດ​ເຈົ້າ​ຂອງ​ທຸລະກິດ​ຄ້າ​ຍ່ອຍ​ແຟ​ຊັນ​ອອນ​ລາຍ Zozo Inc ໄດ້ປະ​ກາດ​ຫາ​ແຟນ​ສາວ​ຮ່ວມ​ເດີນທາງ​ໄປ​ຮອບ​ດວງ​ຈັນ​ກັບ SpaceX ຂອງ ອີລອນ ມັສ ໃນ​ຖານະ​ຜູ້​ໂດຍ​ສານ​ແບບ​ສ່ວນ​ຕົວ​ໃນ​ປີ 2023 ຊຶ່ງ​ຈະ​ຖ່າຍ​ເປັນ​ລາຍ​ການ​ສາລະ​ຄະດີ Full Moon Lovers ​ນຳ​ສະເໜີ​ຜ່ານ AbemaTV ແລະ​ ອອກ​ອາ​ກາດ​ທາງ​ໂທລະພາບ​ຜ່ານ TV Asahi ໂດຍ​ມີ​ເປົ້າ​ໝາຍ​ເປັນ​ຜູ້​ຊົມ​ອາ​ຍຸ​ນ້ອຍ​ທີ່​ອອກ​ຫ່າງ​ຈາກ​ການ​ເບິ່ງໂທລະພາບ​ແບບ​ດັ່ງ​ເດີມ

ເດືອນກັນຍາ 2018 ອີລອນ ມັສ ຊີ​ອີ​ໂອ SpaceX ປະກາດວ່າ ມາເອຊາວະ ຈະ​ເປັນ​ລູກ​ຄ້າ​ລາຍ​ທຳອິດ​ຂອງ SpaceX ທີ່​ຈະ​ບິນ​ໄປ​ຮອບ​ດວງ​ຈັນ​ດ້ວຍ​ຍານ​ອະວ​ະກາດ Starship ຊຶ່ງ ມາເອຊາວະ ຈະ​ເລືອກ​ສິລະ​ປິນ ໄດ້​ແກ່ ຈິດຕະກອນ, ນັກ​ດົນຕີ ຜູ້​ກຳ​ກັບ​ຮູບເງົາ ແລະ ສິລະປິນ​ຄົນ​ອື່ນໆເດີນທາງ​ໄປ​ດວງ​ຈັນ​ດ້ວຍ​ເພື່ອ​ສ້າງ​ແຮງ​ບັນ​ດານ​ໃຈ​ໃນ​ການ​ສ້າງສັນ​ຜົນ​ງານ​ພາຍໃຕ້​ພາລະ​ກິດ​ທີ່​ເອີ້ນວ່າ dearMoon. ຕໍ່​ມາ ມາເອຊາວະ ໄດ້​ເລີກ​ກັບ​ແຟນ​ສາວ​ນັກ​ສະແດງ ອາຢາເມະ ໂກໂຣກິ ໄວ 27 ປີ ຈຶ່ງ​ໄດ້ປະ​ກາ​ຮັບ​ສະໝັກ​ແຟນ​ສາວ​ເພື່ອ​ຮ່ວມ​ທຣິບ​ໄປ​ຮອບ​ດວງ​ຈັນນຳ

 

ມາເອຊາວະ ປະກາດ​ຫາ​ຮຸ້ນ​ສ່ວນ​ຮ່ວມ​ເດີນທາງ​ໂດຍ​ຕ້ອງ​ມີ​ຄຸນສົມບັດ​ເປັນ​ສາວ​ໂສດ​ອາຍຸ 20 ປີ​ຂຶ້ນ​ໄປ ສົດ​ໃສ ​ແລະ​ ເບິ່ງ​ໂລກ​ໃນ​ແງ່​ດີສົນ​ໃຈ​ທ່ອງ​ອະວະ​ກາດ ​ແລະ ພ້ອມ​ສູ່​ການ​ກຽມ​ຕົວ, ຢາກ​ມ່ວນຊື່ນ​ກັບ​ຊີວິດ​ຢ່າງ​ເຕັມ​ທີ່ ແລະ ​ປາດຖະໜາ​ສັນ​ຕິ​ພາບ​ໂລກ ຊຶ່ງ​ຈະ​ປິດ​ຮັບ​ສະໝັກ​ໃນ​ວັນທີ 17 ມັງກອນ ຄັດ​ເລືອກ​ໃນ​ວັນທີ  25 – 26 ມັງກອນ ຈາກ​ນັ້ນ​ຈະ​ນັດ​ພົບກັນກາງ​ເດືອນ​ກຸມພາທຳ​ຄວາມ​ຮູ້​ຈັກ​ນັດ​ພິເສດ​ກາງ​ເດືອນ​ມີ​ນາ​ ​ແລະ ​ຕັດ​ສິນ​ໃຈ​ເລືອກ​ຄູ່​ປາຍ​ເດືອນ​ມີ​ນາ

ຫຼ້າສຸດວັນ​ພ​ະ​ຫັດທີ 16 ມັງກອນ AbemaTV ເປີດ​ເຜີຍ​ວ່າ​ໄດ້​ມີ​ຊຍິງ​ສາວ​ສະໝັກ​ແລ້ວ​ຈຳນວນ 21,700 ຄົນ​ໂດຍ​ຍັງ​ເຫຼືອ​ອີກ 16 ຊົ່ວ​ໂມງ​ທີ່​ຈະ​ເຖິງ​ກຳນົດ. ນອກ​ຈາກ​ນີ້​ແຫຼ່ງ​ຂ່າວ Cnet ຍັງນຳ​ສະເໜີ​ທະວີດ (ໂພສ) ​ຂອງ​ຍິງສາວ​ທີ່​ມີ​ປະຕິ​ກິ​ລິຍາ​ຕໍ່​ການປະ​ກາ​ດຮັບ​ສະໝັກ​ແຟນ​ສາວ​ບິນ​ສູ່​ດວງ​ຈັນ​ໃນ​ເທື່ອ​ນີ້

 

ຊາວ​ຄົນ​ໜຶ່ງ​ກ່າວ​ວ່າ “ຂ້ອຍ​ຕ້ອງ​ການ​ຜູ້ຍິງ​ຄົນທຳອິດທີ່​ໄປ​ດວງ​ຈັນ​ບໍ່​ແມ່ນ​ຍ້ອນ​ນາງ​ເປັນ​ຜູ້​ແຂ່ງ​ຂັນ​ໃນ​ລາຍ​ການ​ຫາ​ຄູ່​ທີ່​ມີລາ​ຄາ​ແພງ ແຕ່​ເປັນຍ້ອນ​ນາງ​ຄວນ​ຄ່າ​ຕໍ່​ຄວາມ​ຮູ້​ທັກ​ສະ​ເທົ່າ​ທີ່​ຜູ້​ຊາຍ​ທຸກ​ຄົນ​ມີ ເພາະ​ນາງ​ເປັນ​ວິ​ສະວະກອນ​ທີ່​ມີ​ຄຸນສົມບັດ​ ຫຼື ​ນັກ​ວິທະຍາ​ສາດ ຫຼື ​ຫຼາຍກວ່າ​ພຽງແຕ່ໂອ​ກາດ​ທາງ​ເພດ

 

ຜູ້ຍິງ​ຄົນ​ນີ້​ກ່າວ​ວ່າ ໃຜ​ຄື​ຜູ້ຍິງ​ຄົນທຳອິດ​ທີ່​ໄດ້​ເດີນທາງ​ໄປ​ຍັງດວງ​ຈັນ ເອີ້ ນາງ​ຊະນະ​ການປະ​ກວດ​ນັດ​ເດດ ບໍ່​ແມ່ນ​ຄຳ​ຕອບ​ທີ່​ຂ້ອຍ​ຕ້ອງ​ການ​ໃຫ້ ແຕ່​ທີ່​ຕ້ອງ​ການ​ຄື ປະຫວັດສາດ​ຈະ​ຈົດ​ຈຳ​ພວກ​ເຂົາ

ຍິ່ງ​ສາວ​ຄົນ​ນີ້​ກ່າວ​ວ່າຂ້ອຍ​ມັກ​ທີ່​ຈະ​ເຫັນ​ແຜນ​ການ​ຂອງ​ນາ​ຊາ​ທີ່​ຈະ​ເຮັດໃຫ້​ຜູ້ຍິງ​ຄົນທຳອິດ​ມີ​ຫຍັງ​ກັບ​ມະຫາ​ເສດຖີເທິງດວງ​ຈັນ (ແປ​ແບບ​ສຸ​ພາບ​ສຸດໆ)

ຂະນະ​ນີ້ SpaceX ຍັງບໍ່​ສະແດງ​ຄວາມ​ຄິດ​ເຫັນ​ໃດໆ ກ່ຽວກັບ​ໂຄງ​ການ​ຫາ​ແຟນ​ສາວ​ທ່ອງ​ດວງ​ຈັນ​ຂອງ ມາເອຊາວະ. ແຕ່​ທີ່​ແນ່ນອນຄື ປາຍ​ເດືອນ​ມີ​ນາ​ຈະ​ໄດ້​ຮູ້​ກັນ​ວ່າ​ໃຜ​ຈະ​ເປັນ​ຍິງ​ສາວ​ທີ່​ຖືກ​ເລືອກ​ໄປ​ດວງ​ຈັນ

ຂ່າວທົ່ວໄປ