ສະຫວັນນະເຂດ ທຸບສະຖິຕິໂຫດ ຕິດເຊື້ອ 631 ຄົນ ຊຸມຊົນ 551 ຄົນ ສ່ວນຫຼາຍຕິດໃນສະຖານທີ່ຄຸມຂັງ

ສະຫວັນນະເຂດ ທຸບສະຖິຕິໂຫດ ຕິດເຊື້ອ 631 ຄົນ ຊຸມຊົນ 551 ຄົນ ສ່ວນຫຼາຍຕິດໃນສະຖານທີ່ຄຸມຂັງ

ໃນວັນທີ 25 ສິງຫາ ປີ 2021 ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຕາງໜ້າຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ໂຄວິດ-19 ຖະແຫຼງຂ່າວ ກ່ຽວກັບ ສະພາບໂຄວິດ-19 ຢູ່ໃນ ສປປ ລາວ ປະຈຳວັນທີ 25 ສິງຫາ 2021 ທີ່ກະຊວງສາທາລະນະສຸກ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກ່າວວ່າ: ການລະບາດຂອງເຊື້ອພະຍາດໂຄວິດ-19 ໃນ ສປປ ລາວ ມາຮອດວັນທີ 25 ສິງຫາ 2021 ມີຕົວເລກຜູ້ຕິດເຊື້ອສະສົມທັງໝົດ 13.909 ຄົນ, ຄົນເຈັບເສຍຊີວິດສະສົມ 11 ຄົນ ແລະ ກໍາລັງປິ່ນປົວ ທັງໝົດ 4.366 ຄົນ. ໃນວັນທີ 24 ສິງຫາ 2021 ໄດ້ກວດວິເຄາະທັງໝົດ 3.107 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 952 ຄົນ ເປັນຕົວເລກສູງທີ່ສຸດ ນັບຕັ້ງແຕ່ມີການລະບາດຜ່ານມາ ສປປ ລາວ ເຊິ່ງຕິດເຊື້ອໃນຊຸມຊົນເຖິງ 594 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາຄື: ຢູ່ສະຫວັນນະເຂດ 551 ຄົນ, ບໍ່ແກ້ວ 29 ຄົນ, ນະຄອນຫຼວງ 11 ຄົນ, ຈຳປາສັກ 1 ຄົນ, ແຂວງວຽງຈັນ 1 ຄົນ, ໄຊຍະບູລີ 1 ຄົນ.

ໃນວັນທີ 25 ສິງຫາ 2021 ລວມຕົວເລກຜູ້ຕິດເຊື້ອໂຄວິດ-19 ຢູ່ແຂວງສະຫວັນນະເຂດມີທັງໝົດ 631 ຄົນ ໃນນັ້ນ ເປັນກໍລະນີນໍາເຂົ້າສະຫວັນນະເຂດ 80 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.ແລະ ຜູ້ຕິດເຊື້ອໃນຊຸມຊົນທີ່ມີປະຫວັດສຳພັດໃກ້ຊິດກັບຜູ້ຕິດເຊື້ອເກົ່າຈຳນວນ 551 ຄົນ.

ສຳລັບປະຫວັດຜູ້ຕິດເຊື້ອໃນຊຸມຊົນ 551 ຄົນ ຢູ່ແຂວງສະຫວັນນະເຂດ, ກວດພົບຢູ່ສະຖານທີ່ຄຸມຂັງ 543 ຄົນ ແລະ ກຸ່ມຄົນທົ່ວໄປ 8 ຄົນ ຄື: ພະນັກງານບໍລິສັດລ້ານຊ້າງມິເນໂຣນ 5 ຄົນ, ພະນັກງານການຢາຢູ່ໂຮງໝໍແຂວງ 1 ຄົນ, ຊາວຄ້າຂາຍ 1 (ຢູ່ບ້ານອຸດົມວິໄລ) ແລະ ຜູ້ສຳຜັດໃກ້ຊິດກັບພະນັກງານບໍລິສັດລ້ານຊ້າງມິເນໂຣນ ທີ່ິິຕິດເຊື້ອ 1 ຄົນ.

ຂ່າວທົ່ວໄປ