ປັດຈຸບັນ ສປປ ລາວ ຍັງບໍ່ທັນພົບການຕິດເຊື້ອພະຍາດອັກເສບປອດສາຍພັນໃໝ່ ໂຄໂຣນາ ທີ່ເກີດ ຢູ່ເມືອງ ອູຮັ່ນ, ສປ ຈີນ. ແຕ່ທາງການລາວກໍໄດ້ເພິ່ມທະວີການເຝົ້າລະວັງຕິດຕາມ ແລະ ສະກັດກັ້ນພະຍາດດັ່ງກ່າວ ໂດຍສະເພາະແມ່ນດ່ານສາກົນຕ່າງໆ ດັ່ງສະໜາມບິນສາກົນວັດໄຕ ໄດ້ເພິ່ມທະວີການກວດກາຜູ້ເຂົ້າ–ອອກ ຢ່າງເຂັ້ມງວດ ແລະ ໄດ້ອອກແຈ້ງການຍົກເລິກຖ້ຽວບິນຊົ່ວຄາວຫຼາຍສາຍຈາກນະຄອນຫຼວງວຽງຈັນ ໄປຫາ ສປ ຈີນຄື: ວຽງຈັນ–ຊາງໂຈ, ວຽງຈັນ–ຫາງໂຈ ແລະ ວຽງຈັນ–ຊຽງໄຮ້ ແລະ ເຮັດໃຫ້ມີນັກທ່ອງທ່ຽວຈີນຕົກຄ້າງເປັນຈຳນວນຫຼາຍ
ສປປ ລາວ ມີຖ້ຽວບິນໄປຈີນທັງໝົດ 9 ເສັ້ນທາງຄື: ຄຸນໝິງ, ກວາງໂຈ, ຫາງໂຈ, ຊາງສາ, ຊຽງໄຮ້, ເວີນໂຈ ແລະເສີນຕູ, ຈາກນະຄອນຫຼວງພະບາງ ໄປຫາ ຊາງສາ ແລະ ຊຽງຮຸ່ງ. ເພື່ອສະກັດກັ້ນການແຜ່ລະບາດ, ສະໜາມບິນໄດ້ເປັນເຈົ້າການໃນການຈັດຕັ້ງປະຕິບັດກວດກາຜູ້ໂດຍສານທີ່ມາຈາກຕ່າງປະເທດ, ໂດຍສະເພາະເດິນທາງມາຈາກ ສປ ຈີນ, ໂດຍການຮ່ວມມີກັບກະຊວງສາທາລະນະສຸກຕິດຕັ້ງອຸປະກອນ ແລະ ການກວດກາຜູ້ໂດຍສານທີ່ເຂົ້າ–ອອກ ສປປ ລາວ, ຕິດຕັ້ງເຄື່ອງເຕີໂມສະແກນ (ເຄື່ອງສະແກນວັດແທກອຸນຫະພູມ) ເປັນທີ່ຮຽບຮ້ອຍ, ພ້ອມທັງໄດ້ຕິດຕັ້ງບ່ອນລ້າງມື ແລະ ນ້ຳຢາຂ້າເຊື້ອໃຫ້ກັບຜູ້ໂດຍສານ ແລະ ໄດ້ເນັ້ນໃຫ້ພະນັກງານເອົາໃຈໃສ່ປ້ອງກັນເຊື້ອພະຍາດ, ໂດຍການໃສ່ໜ້າກາກ. ປັດຈຸບັນມີສາຍການບິນທັງໝົດ 18 ສາຍ ໃນນັ້ນໄດ້ມີສາຍການບິນໂດຍກົງຈາກ ສປ ຈີນ ວັນລະ 2 ຖ້ຽວ
ຜູ້ອຳນວຍການໃຫຍ່ ລັດວິສາຫະກິດດັ່ງກ່າວໃຫ້ຮູ້ອີກວ່າ ໄລຍະນີ້ ຈຳນວນນັກທ່ອງທ່ຽວຈີນໄດ້ຫຼຸດລົງ ແຕ່ກໍຍັງມີນັກທ່ອງທ່ຽວປະເທດໃກ້ຄຽງ ທີ່ເດິນທາງເຂົ້າມາເປັນຈຳນວນຫຼາຍ ສະນັ້ນ ເພື່ອຮອງຮັບຜູ້ໂດຍສານ ພາຍຫຼັງການຫຼຸດຖ້ຽວບິນຈາກ ສປ ຈີນ ຊົ່ວຄາວ ລັດວິສາຫະກິດການບິນລາວພວກເຮົາ ກໍໄດ້ເພິ່ມຈຳນວນຖ້ຽວບິນສາຍອື່ນ ໂດຍສະເພາະແມ່ນສານການບິນພາຍໃນປະເທດ ເພື່ອອຳນວຍຄວາມສະດວກແກ່ຜູ້ມາໃຊ້ບໍລິການ