ຈາກປະເດັນດຣາມ່າ “ບຸນບັ້ງໄຟບ້ານໂພນສິມ”ປົດນາຍບ້ານແລະປິດການເຂົ້າ-ອອກບ້ານ ເປັນເວລາ 14 ມື້

ຈາກປະເດັນດຣາມ່າ “ບຸນບັ້ງໄຟບ້ານໂພນສິມ”ປົດນາຍບ້ານແລະປິດການເຂົ້າ-ອອກບ້ານ ເປັນເວລາ 14 ມື້

ຈາກປະເດັນດຣາມ່າ “ບຸນບັ້ງໄຟບ້ານໂພນສິມ” ຫຼ້າສຸດທາງຄະນະພັກ-ຄະນະປົກຄອງນະຄອນໄກສອນພົມວິຫານ ໄດ້ປະຕິບັດວິໄນຕໍ່ຜູ້ກ່ຽວຂ້ອງແລ້ວ ໂດຍໄດ້ປົດຕຳແໜ່ງເລຂາຄະນະພັກຮາກຖານ  ເລຂາໜ່ວຍພັກ ເຊິ່ງເປັນທັງນາຍບ້ານໂພນສິມ ລວມທັງປິດການເຂົ້າ-ອອກບ້ານບ້ານໂພນສິມ ເປັນເວລາ 14 ມື້ ນັບຕັ້ງແຕ່ວັນທີ 2 ພຶດສະພາ 2021 ເປັນຕົ້ນ

ທັງນີ້ເຫດການທີ່ເກີດຂຶ້ນແມ່ນເນື່ອງມາຈາກ ເມື່ອວັນທີ 2 ພຶດສະພາ 2021, ອຳນາດການປົກຄອງ ເຖົ້າແກ່ແນວໂຮມພາຍໃນບ້ານໄດ້ມີການຫ້າງຫາກະກຽມເພື່ອຈັດບຸນບັ້ງໄຟ ໂດຍໃນເບື້ອງຕົ້ນແມ່ນມີຈຸດປະສົງຈະຈັດແບບກະທັດຮັດຕາມຮີດຄອງ ແຕ່ເມື່ອມີການເຕົ້າໂຮມກັນປະຊາຊົນພາຍໃນບ້ານຈຶ່ງພາກັນແຫ່ມາຮ່ວມໂດຍມີການກິນເຫຼົ້າເບຍ ຫຼິ່ນນໍ້າເປື້ອນ ນໍ້າມັນ ແລະ ເສບແຫ່ຕາມທີ່ເຄີຍເຮັດກັນ ແລະ ພາຍຫຼັງມີການເຜີຍແຜ່ຄລິບດັ່ງກ່າວລົງໃນໂຊຊຽວມີເດຍ ຈົນເກີດສຽງວິພາກວິຈານ ແລະ ເລື່ອງດັງໄປຮອດຫູຂອງຄະນະນຳນະຄອນໄກສອນພົມວິຫານ.

ທັງນີ້ ເຫດການທີ່ເກີດຂຶ້ນອີງຕາມການຖະແຫຼງຂອງຄະນະນຳນະຄອນໄກສອນ ລະບຸວ່າເປັນການລັກຈັດ ແລະ ບໍ່ໄດ້ຮັບການອະນຸຍາດຈາກເຈົ້ານະຄອນໄກສອນພົມວິຫານ ລວມທັງລະເມີດຄຳສັ່ງຂອງສູນກາງ ແລະ ທ້ອງຖິ່ນກ່ຽວກັບການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໂດຍສະເພາະຄຳສັ່ງ 211/ຈນ.ກສ ລົງວັນທີ 25 ເມສາ 2021 ທີ່ເຫັນດີໃຫ້ປິດນະຄອນ ໂດຍເນື້ອໃນໄດ້ຫ້າມການຈັດກອງປະຊຸມ ໂຮມຊຸມນຸມ ງານດອງ ງານບຸນປະເພນີ ງານທາງສາສະໜາ ແລະ ງານລ້ຽງສັງສັນຕ່າງໆ.

ສະນັ້ນແລ້ວ ທາງຄະນະນຳຂອງນະຄອນໄກສອນພົມວິຫານ ຈຶ່ງໄດ້ມີມະຕິປົດຜູ້ເປັນເລຂາຄະນະພັກຮາກຖານ, ເລຂາໜ່ວຍພັກ ເຊິ່ງເປັນທັງນາຍບ້ານບ້ານໂພນສິມ ແລະ ຈະມີການປະຕິບັດວິໄນຕໍ່ກັບຜູ້ມີສ່ວນຮ່ວມໃນຄັ້ງນີ້.

ພ້ອມນີ້ ກໍຍັງໄດ້ມີການສັ່ງປິດການເຂົ້າ-ອອກບ້ານໂພນສິມເປັນເວລາ 14 ວັນ ເລີ່ມແຕ່ວັນທີ 2 ພຶດສະພາ 2021 ເປັນຕົ້ນໄປ ເພື່ອຕິດຕາມອາການຂອງຄົນໃນບ້ານທີ່ຜິດປົກກະຕິ ເພື່ອກວດກາເຊື້ອຕໍ່ໄປ.

ຂ່າວທົ່ວໄປ