ເວັບໄຊຄະນະກຳມະການສາທາລະນະສຸກນະຄອນຊຽງໄຮ ໂພສເມື່ອວານນີ້ວ່າ (20 ມັງກອນ) ຢືນຢັນວ່າມີຜູ້ປ່ວຍທີ່ຕິດເຊື້ອໄວຣັດໂຄໂຣນາສາຍພັນໃໝ່ 2019-ເອັນໂຄວີ ແລ້ວເປັນລາຍທຳອິດຂອງເມືອງ ເຮັດໃຫ້ຍອດຜູ້ປ່ວຍພະຍາດນີ້ທີ່ມີການຢືນຢັນແລ້ວໃນປະເທດຈີນ ເພີ່ມເປັນ 218 ລາຍ
ດ້ານສະຖານີໂທລະພາບຊີຊີທີວີ (CCTV) ຂອງລັດຖະບານຈີນ ລາຍງານວ່າ ຕົວເລກຜູ້ປ່ວຍໃນນະຄອນຫຼວງປັກກິ່ງ ແລະ ແຂວງກວາງຕຸ້ງ ເພີ່ມຂຶ້ນມາຢູ່ທີ່ 5 ແລະ 14 ລາຍຕາມລຳດັບ ເມື່ອເວລາ 18:00 ໂມງ ຕາມເວລາທ້ອງຖິ່ນ ຊຶ່ງໄວກວ່າລາວ 1 ຊົ່ວໂມງ ສ່ວນຕົວເລກຜູ້ປ່ວຍທີ່ເມືອງອູ່ຮັ່ນ ແຂວງເຫີເປີ່ຍ ຍັງຢູ່ທີ່ 198 ລາຍເຊັ່ນເດີມ
ສະຖານີໂທລະພາບດັ່ງກ່າວລາຍງານອີກວ່າ ພົບຜູ້ຕ້ອງສົງໄສວ່າອາດຕິດເຊື້ອນີ້ໃນແຂວງເສສວນ 2 ລາຍ, ແຂວງຢຸນນານ 1 ລາຍ ເຂດປົກຄອງຕົນເອງກວ່າງຊີ-ຈ້ວງ 1 ລາຍ ແລະ ແຂວງຊານຕົງ 1 ລາຍ
ເມື່ອໄລຍະທີ່ຜ່ານມາຂອງວານນີ້ ມີການລາຍງານວ່າ ຜູ້ປ່ວຍພະຍາດດັ່ງກ່າວເສຍຊີວິດເພີ່ມອີກຄົນເປັນ 3 ຄົນແລ້ວ ຊຶ່ງເປັນຜູ້ປ່ວຍທີ່ເມືອງອູ່ຮັ່ນ ທີ່ຂະນະນີ້ເຊື່ອວ່າເປັນແຫຼ່ງທີ່ພະຍາດດັ່ງກ່າວເລີ່ມລະບາ